الأحد، 29 جويلية، 2007

اولادك...... يا تونس



اولادك...... يا تونس

على مرا عربية ...
حرة وبنت اصل ....
حاولوا في مرة جماعة فرنسيس
والمان يغتصبوها ..
وكي كانت اشد منهم وتغلبت عليهم ..
سماوها ...جمهورية
جابت ثلاثة اولاد ....
ولد سماتو ... سيف
وزوز بنات .... عدالة ....و.بحرية
وبما انو ها المرا ذكية وحكيمة ما فضلت حد من اولادها على الاخر
وخلتلهم المجال باش يصرفوا امرهم بانفسهم
لكن كي عادة الاولاد الكل في الشرق
طغى الولد على اخواتو
وصار يتحكم فيهم
عدالة كانت بنية ياسر حشامة وما تتكلمش على روحها
وكانت مطيعة وشديدة الولاء لولي امرها ...
اما بحرية فكانت بطبيعتها مولودة معاقة مسكينة
ما عندها قدرة على فعل حتى شيء
وكان سي سيف متسلط عليهم
مرة باسم الاخوة وكانو هو المسؤول على اخواتو
ومرة باسم القيم الاسلامية اللي اعطات للذكر مثل حظ الانثيين ..
و بما انها المرا ما يلزمهاش تعلي سوطها ..
ولا تخرج من الدار ...
وتحتشم في سلوكها قدام الراجل
عاد ..طغى سي سيف وتجبر على اخواتو وبدا يعامل فيهم بقسوة ...ودونية
وزيد ...بوه عجبو هالوليد الدلول
والبو .. كبر وشاخ .. وما عادش في حالو باش يردو
وكيما كان البو متجبر جا ..ولدو.... اكثر واشد
فقام اختار لاخواتو عرسان من غير ما يشوفوهم
خاطر موش في سبرهم المرا تتكشف على الراجل
كان ليلة الدخلة ..
تزوجت البنية عدالة من قاضي
اعطاتو العصمة
وتزوجت بحرية من حارس الخليفة
زاد على مرضها مرض ....
وهذا زاد من هم هاك الاميمة
اللي بدت تكبر ...وتشيخ
وتجاوزت العقد الخامس ...
هاك البنيات فرخو
وجت غلتهم .... كائنات مشوهة
شوية عندهم انيميا الحرية
وشوية مصابين بتضخم عقدة الخوف
angoisse كيما يسميوه متاعين البسيكولوجيا
وشوية مغرورين بحب الكراسي " ديما-كراسي
" demo-cratie
واخرين برشة عندهم مرض الكره لكل شيء – حتى لديارهم
وهذا مرض جديد ما نجموشي يشخصوه الطبة
جماعة اخرينة عاملين كقنديل باب منارة – رجل لداخل ورجل لبرة
اخرين انصرفوا عن الدنيا وزهدوا في الماكلة والشرب وطولوا اللحي وماعادشي مسيبين الجامع
اخرين مازوشيين يقتلوا في ارواحهم بالادمان ديما شرب وتدخين وخارجين من عفو ربي ....
زعمة الحكاية هاذية تطووول ...؟؟
ما يجيش نهار زعمة ها الوليدات يحطو ايديهم في ايدين بعضهم
ويمشيو لخوهم الكبير سيف
ويقولولو هيا نتفاهمو يا اخي

.....سامحوني الحكاية لعب فيها المقص في الاخر...

هناك 6 تعليقات:

غير معرف يقول...

Tu es plein de bonnes intentions... La Tunisie n'existe plus!

FREE-RACE يقول...

الأكيد اللي سيف باش يقدام و ياكلو الصديد و يتحط في المتحف... لكن الخوف من أولاد سيفنا: الموس و...ال
coupe-ongle ;)

غير معرف يقول...

effectivement echkoun bouh hétha SEIF ?! ommou kenit bint asl héka elli fhimtou ...ama bouh darchou barcha widlel ikhallaf el hbel ou héthéka illi sar ...3ala kol hal mra jebit ouled khir men innha ma jebitch men aslou...fi youm mil ayem iji wlayed béhi, ndhif, i7in 3la khwetou ...wa9tech ...allahou a3lam

ابو ناظم المرزوقي يقول...

bouh rajel kbir cheikh wakour
ismou hizb edoustour

غير معرف يقول...

9allik "itha 3ourifa'ssabab batoula'l 3ajab" ...ti bouh hétha kber lin kharraf ...normal ittfol iwali hors contrôle !! zeda el bou 3mil bi3meilou ...wittfol binou ou bin rou7ou i9oul ..san3it bouk lai'3airouk !

ابو ناظم المرزوقي يقول...

oui c ca c le comencent d'un fin milodrame