الثلاثاء، 11 مارس، 2008

اخبار ما كانتش باش تتذاع؟؟؟



في الشان المحلي :-*الزوز توريست من النمسا اللي ضاعوا في الصحراء متاعنا قالك كانوا يفكروا باش يبعثولهم فيلق من الدراجات النارية من نوع 51 معروفة في دوز برشة عند عامة الشعب وكنت حكيت على مواصفاتها قبل في تدوينة سابقة هاو شوف هنا ومعروفة عند جماعة المصيد الي عندهم خبرة لا تضاهى بالصحراء تتفوق على كلgps انظمة التوجيه الالكتروني واللي اثبتت نجاعتها قبل في العثور على اربعة قورة المان ضاعوا في الطريق وقريب يموتوا بالعطش وتم العثور عليهم وانقاذهم .
-*مواطن مزمرة عليه مازال كي خرج من الحبس ما عندوش مورد رزق حب يقابل المعتمد مرتين والا ثلاثة يمشي للمعتمدية يقولولو اللي السيد المعتمد في اجتماع فد مشا طلع لعرصة تليكوم في وسط البلاد وهدد باش يرمي روحو اذا ما يجيش المعتمد ويقابلو عند البوتو وفعلا جاء السيد المعتمد وسمع السيد الوالي وجاء رئيس الجامعة ورئيس المنطقة متاع الشرطة والحرس والعالم ؟؟وبداو يكلمو فيه على البورتابل غير اهبط وخوذ اش تحب ياخي بدا السيد يطلب طلب مصروف وطلب قرض واسترجاع اوراقة المحجوزة عند الشرطة وفعلا سلموه 100 دينار حاضر وعمرولو مطلب قرض باربعة ملاين ورجعولو اوراقه.
-* رئيس ادرة الفلاحة وتطبيقا للتعليمات اللي جاتو بمنع الصيد يعني غلق موسم الصيد في الصحراء التونسية واللي ديمة مغلقة على القلالة - الا على السعودي كي يجي يحوس يهز الكل - توسع في المرسوم هذاي وزاد منع صيد الجرابيع والجرذان وانتوما تعرفو اللي العباد في الصحراء بعد غلاء اللحوم الحمراء والبيضاء ما بقالهم كان لحوم الفئران ياخي عمل حملة عل كل صياد يلقى عنو منادف يغرمو ب25دينار للجرذ الواحد حتى كتب عليهم شاعر شعبي معروف قصيدة هجائية لاذعة ياخي نقلو السيد المسؤول وتم السماح اخيرا للمواطنين بالتهام وجباتهم المفضلة من الفئران الحمراء .
-* بعد ما رفضت ادارة مهرجان دوز باش تعمل تقييم للدورة 40 اللي ثبت بالكاشف انها دورة فاشلة بكل المقاييس -وكنت حكيت عليها هاهو شوف هنا - عمل حزب معارض رسمي مائدة مستديرة حول افاق وواقع نشاط المهرجان وشاركت انا العبدولله فيها وقلت اللي يلزم يتقال وخرجتها جريدة الوطن -هاهو شوف هنا -ياخي تفاجئ الجمهور المدة هاذي بتغيير كامل هيكلة مهرجان دوز وطاحت الرؤوس الكبيرة والزروس المسوسة وجابت تشكيلة جديدة ولكن الطريقة اللي تمت بيها العملية كيما يقولوا المقربين من السلطة انها جاءت على خلفية هالمائدة المستديرة اللي فضحت ماكان مخبي خاصة بعد ماشارك فيها اطراف ناشطة في ادارة المهرجان ما خلصتش في فلوسها واتهمت ادارة المهرجان بالتلاعب باموال المهرجان على كل التغيير باهي اما اش كان عليه لو كان في جلسة عمومية تحضر العباد الكل وتخلي العباد تشارك وتعطي ارائها على خاطر في بالي المهرجان متاع الناس الكل موش متاع التجمع بركة .

في الشان الوطني :-* ابدع سي برهان بسيس في بيان وجهة نظر الحكومة في اختفاء السائحين النمساويين البارح في قناة الجزيرة وهو حرص كي العادة على اخفاء ما يبدو واضحا وكيما تعودنا من التلفزة الوطنية جدا انها ما تسكتش على المسائل الكبيرة ولكن يظهر الاعلاميون باش ينفو الخبر اصلا او انهم يقللو من شانه( بالمناسبة انا نذكر كنت تفرجت في الجزيرة زادة بعد تفجير معبد الغريبة وطلع علينا سي بوبكر الصغير ويحلف اللي انسابو في جربة اكدولو كون الحكاية كميونة غاز حادت عن السكة متاعها ) وانا نسال علاش ماتعملش تلفزتنا الحريصة على اظهار الحقيقة باش تعمل ماوراء الخبر وتعطينا مباشرة اللي ممكن يتقال في تلفزات اخرى نتهموها ساعات بالمبالغة والتضليل وهاهو عندنا اعلامي يعمل الكيف ينجم ينشط برنامج كيما هكة .
-* مش عارف علاش الاستعجال اختيار انظمة الانخراط في الكنام واللي تحددت يوم 31 مارس اخر اجل خاصة وان الاطراف المعنية ماهياش موافقة او فاهمةاش معناها كنام بعد ما قريت انو نقابة الصيادلة معترضة ونقابة الاطباء الاساتذة مازالت ماصححتش على العقد مع الكنام وانو نقابات التعليم بعثت تطلب عدم المشاركة في الاختيار لانها طلبت التاجيا بشهر واحد للاستعلام وانا نسال علاش التلفزة متاعنا العزيزة ماتعملش برنامج ثري يجمع الاطراف الكل على طاولة واحدة ويفركو الرمانة قدام الناس الكل ماهو الرئيس طلب منهم في الاذاعة الاهتمام بمشاغل المواطن .
والى اخبار اخرى جادة وواقعية ؟؟؟

هناك 3 تعليقات:

Tarek Kahlaoui يقول...

حكاية إلي طلع في العرصة تشبه ياسر لحكاية خيالية رواها كلاندو توة أشهر... الخيال يصبح حقيقة؟

أرابيـكا يقول...

نطلبو ياسر زعمة من اعلامنا النظيف لو كان اتولى النشرة الجهويّة متاعو هكّة امّا نتصوّر انو اعلامنا تالمون نظيف نظيف نظيف لين ماعاد عندو ما يقول كان التقارير اللى اتجيه مصحّحة ومصادق عليها
طارق : الحقيقة كى اتولى ضبابيّة مثلا كميون القاز اللى حاد على السّكة في جربة بعد خمسةاو عشرة سنين اخرين توة اتولى الحكاية نيزك من زحل ضرب معبد الغربيّة عندنا تبارك اللّه طاقات اترجّع الحقيقة أسطورة ممكن ياسر تعرفها الحكاية متاع آسترنب ههههههه

abunadem يقول...

اهلا طارق
الحكاية بلحق وقعت الاسبوع اللي فات نهارت الاربعاء اما انا ما خلطتش عليها والا راني صورتها .هاني نلوج في شكون صورها توة نهبطها كان لقيت الصورة.
شكرا على الزيارة

ارابيكا شكرا للزيارةعندك الحق اعلامنا متاع بندير موش متاع تقارير