الأربعاء، 19 مارس 2008


افراح الربيع؟؟؟
افراح الربيع بعيد الزهر وتفتح النوار على تونس الخضراء ديما برغم البوار السياسي والاجتماعي وان شاءالله مايكونش الفلاحي هذه السنة مع مؤشرات نزول الامطار الاخيرة .
افراح الربيع النقابي مع انطلاق المفاوضات الاجتماعية اللي نتمنو باش تكون مرة في العام مش مرة كل 3 سنين على خاطر الزيادات في الاسعار ماعادش محددة بسقف ميزانية الدولة بل بارتفاع سعر البرميل ونتمنو انها الزيادات هذه ما تشملش الخبزة اللي يقولو باش يزيدوها ها النهارات عفوا باش يعدلو في سعرها خاطر ريحتها فاحت مع ريحة القاز اللي شعلت .
افراح ربيع الفنون مع انتشاء الحراك الثقافي في البلاد وظهور مهرجانات للموسيقى والمسرح وتنشيط شوارع تونس اللي نتمنو انو يرافقو رفع اسم بلادنا من قائمة الدول المضيقة على حرية الاعلام والانترنت باش تكون الفرحة حقيقية .
افراح ربيع الشباب والاستقلال اللي نتمنو باش يكون استقلال فعلي يهتم بمشاغل الشباب ويفتح استشارة حقيقية تنتشل الكثيرين وخاصة منهم اصحاب الشهائد اللي معبيين القهاوي ويفكروا في الحرقة .
ربيع المولد اللي نتمنو يكون فرصة للعباد تفهم ان عيد المولد متاع الناس الكل و موش مناسبة بركة للعصيدة والا للتكفير والاقصاء .
ربيع الانفراج السياسي ان شاءالله يكون على اهلنا في غزة ورفع الحصار عليهم .
ربيع افراح الزواج بعد ما قرر خونا ادم يغادر العزوبية نتمنو برشة اخوة مدونين وخاصة اللي يابنو فيه باش يخلطو عليه ويستقرو .
ربيع التقدم العلمي والحصول على الشهادات العالية كيما عمل خونا طارق وضرب الدوكتوراه خبطة وحدة نتمنو نعملو كيفو ونتبعوه وخاصة اللي مازالت عندهم الفرصة للقراية .

هناك تعليقان (2):

غير معرف يقول...

أفراح ربيع مشروعة جدّا أتمنى ان تجد لها أرضا خصبة لتعرّش وتنمو وتضفي على حياتنا ألوان قوس قزح

غير معرف يقول...
أزال أحد مشرفي المدونة هذا التعليق.