السبت، 6 ديسمبر، 2008

اليوم الوطني للمشوي : كل عام وانتم بخير



عيد اللحم يسموه الكبار وهو فعلا عيد اللحم خاطر اللحم الابيض متاع الدجاج اللي معدتنا تعودت عليه سريع الهضم وما يثمرش ينزل بسرعة خاطر دجاج الماكينة ابيض بطبيعتو blanc معناها فالصو بالدارجة ينفخو فيه باش يهيش ويوزن وما يقلقش المعدة متاع الفقراء والمزمرين هاكة علاش ما نسموشي لحم ...اما الصحيح ما نشوفوه كان مرة في العام ...رحم على سيدك ابراهيم اللي حلم بولده يذبح فيه والا راه مانعرفوشيي العيد ...اما ردو بالكم راه الدكتور حكيم يمشي ويوصي راه اللحم هذا موشو باهي زادة قالك فيه الكولسترول والا شنوة ؟؟؟ يعني يعمل الشحم في الدم ؟؟؟ تي هو احنا عندنا اصلا دم ؟؟والا شحم ؟؟؟تي شوية عظم على شوية جلد ؟؟تي ماهو حتى الدكتور محسن قاللهم على قول الشيخ امام اللحمة تسم اكيد ؟؟كولو الفول ؟؟خايف حتى احنا يطلعولنا المشوي مضر بالصحة وينفخونا ريوسنا بالحكم الطبية ونصايح ترجعلنا الدجاج الابيض احسن من العلوش ؟؟ولهذا نقول لكل فقرائنا والناس المزمرة انزلوا على المشوي راه نهاركم ...انسوا الدجاج ...
هذا يوم وطني للمشوي كيما اقترح طاها متاع مدونة ابتسامة من الجنوب ...والجماعة اللي يحبو الكيف ...ما نحكيلهمش كيفاش يعملو الراس والكوتلات ..هذه فرصتهم ...

هناك تعليقان (2):

ferrrrr يقول...

يعطيك الصحة

محمّد الخامس يقول...

بالرّغم أنّي مانحبّش اللّحم لحمر على خاطر فعلا موش باهي في سنّ معيّنة وعلى خاطر أنا ما نوافقش على فكرة القتل المقدّس إلاّ أنّي ضحكت برشه على مقالك الحلو يا أبا ناظم واكتشفت فيك القدرة على الكتابه الهزليّة