الاثنين، 24 نوفمبر 2008

ارفعوا الحصار :مقترح لكسر الحصارالى اتحاد الشغل عندنا مدرسة حشاد في غزة وبحاجة الى معونات ؟؟


اليوم في حصة من حصص الدراسة جاء السيد المدير يعمل فيدورة على التلامذة اللي مازالو ما دفعوش لصندوق 2626 وكان باش يخرج تلميذ من الحصة خاطروا ما دفعش 500مي والحقيقة الموقف غاضني وما عجبنيش خاطر التبرع موش الزامي .توا بالله معقول واحد يدفع وهو ما عندوش والله يعلم بظروفو وزيد المفروض الواحد يعرف وين تمشي الفلوس بعد ما دفع ها الصندوق اللي كل عام نضخوا فيه اموال محددة مسبقا حسب كل مؤسسة ممكن تكون سنة باهية اما في اطار الشفافية ..هاهو يا سيدي مقترح وغزة اطفالها محاصرة وممنوع على اطفالها الحليب والغذاء والدواء من دول شقيقة وصديقة احنا يا سيدي اتحاد الشغل قام ببادرة رائعة من سنوات وهي انشاء مدرسة ابتدائية اسمها مدرسة فرحات حشاد بايادي واموال تونسية من فلوس الخدامة ها المدرسة عندنا الحق باش نتفقدوها ساعة ساعة بحويجة بتمويل بدواء بغذاء بلوازم مدرسية كان لزم اللي المفروض يكون ديمة موش كان وقت الحصار والا زيد توا علاش لا موش حتى قافلة طبية تمشي لغزة وهات يا سيدي اقتطعوا جزء من صندوق 2626 وابعثوه في شكل دواء وغذاء وهكة يولي ها الصندوق دولي بحق ماو نحبو ندولنوه احنا ما ثماش خير من ها الفرصة والا يا سيدي افتح بركة حملة تبرع وتوا تشوف العباد باش تتبرع ؟؟؟ اما بشرط يشرف الاتحاد على الحملة هاذي باش تاخذ صبغة رسمية ..انا نتذكر ايام حصار العراق لما الاتحاد عمل حملة لرفع الحصار كيفاش الاتحاد ولى خلية تدب بالحياة لتنشيط الحملة واللي شدني وقتها راجل كبير جاء حب يتبرع بدمو قالو الطبيب الدم طايحلك انت عندك 10 قالو خوذ 5 وخلي 5 وبجدو يقول فيها ؟؟؟
اما الله يهدي اللي كان السبب ؟؟؟ والله عيب اكبر عيب ان غزة في الظلام والجوع والرئيس عباس يلوج على ولاية اخرى للرئاسة وعلى موالاة في غياب اطراف تم استبعادها هذا موش وقتو يا سيد ابو مازن انت رئيس كل الفلسطينيين وموش فقط فلسطينيي رام الله والضفة ...؟؟؟ والا تقول انت الكرسي خير من شطر شعب شبه ميت ؟؟؟


هناك تعليقان (2):

HNANI يقول...

كلام معقول واقتراح وجيه، أضم صوتي لصوتك و أناشد كل تونسي حر و عندو الإمكانيات باش يجسّم الروح و القيم الإنسانية في تبرّع لأطفال غزّة
أمّا فيما يخص السيد المسؤول إلّى يفرض على التلميذ باش يساهم في صندوق 2626 انقلو راهي يخالف في القانون ، والعمل التطوعي ماهوش اجباري... وكان جاء يفهم و مقتنع بالهدف متاع الصندق راهو حط يدو في جيبو و عاون هاك التلميذ، لأنو ممكن ياسر يكون من مناطق الظل ولا الذل.

abunadem marzouki يقول...

شكرا هناني لمرورك ولمشاعرك ما ينقص فقط المبادرة لا اعلم اتحاد الشغل كان سباقا من قبل في مثل هذه المناسبات لا اعلم ما اخرسه ؟؟؟؟