الخميس، 17 أفريل، 2008

الزيادة في سعر الخبز ....يبدأ باشاعة؟؟؟


اليوم وانا عند العطار نشري في فطور الصباح كي العادة اول حاجة نشريها هي الخبزة ياخي ضحك العطار وقالي راهي الخبزة باش تغلى قلته كيفاش هذي حكاية نسمعو بيها ومنتظرة لكن زعمة قداش باش يزيدو فيها ووقتاش ؟؟
قالي ما ثمة حتى شيء اكيد ولكن الكواش اللي يجيبلو في الخبز سمع انو الخبزة باش تولي كان باقات اهكاهو الخبز الكبير

باش يتنحى وتبقى الباقات بنفس السوم متاع الكبيرة معناها 240مليم ولكن تتباع كان الصباح والعشية باش تتباع الخبزة اللي موش مدعومة بسوم يحددو الكواش حسب نوعية وحجم الخبزة الللي باش يصنعها معناها خبز شعير والا قمح صلب والا لين والا مخلط ولو كان الاعتقاد هذا صحيح انا يظهرلي باش نولو كي مصر فطور الصباح نشرو خبز " متاع الجمعية" وترصيل للواحد شاد "طابور "معناها صف وضارب ومضروب على باقات وشوف تخلطتش



وتولي العباد تشري بالزايد التالي ما يبقالو شيءوالكواش باش يولي ينقص من الكمية متاع الصباح باش يربح اكثر ويزرف "فارينة الحاكم" المدعومة مع فارينتو هو باش يزيد رصيده في البنك على حساب "الغلابة"...و نبدو وقتها نتحسرو على فارينة اماريكا اللي كانو يجيبونه فيها قبل معبية بالسوس ومكتوب على شكايرها هاك الشعار اللي كنا نفطرو عليه واحنا صغار " هدية من الشعب الامريكي " ومكتوب زادة من الجهة الاخرى " ليس للبيع ولا للمبادلة "...اييييه يا حسرة على اعانات مريكا.
والالا ترصينا نرجعو وقتها لخبز الطابونة وايجا حاسبني وقتها كان خلطت على خدمتك في الوقت؟؟؟


هناك تعليق واحد:

HNANI يقول...

فاش تحكي يا أبو ناضم؟ تهي توا خبزة الطابونة حاجة هاي، سومها 500 مليم و في رمضان إتولي ب 800 مليم.. عاد الطابونة إتولي أغلى و اشكون يقدر عليها؟

أنا إنشوف إلي فمّة زوز مشاكل اللول غلاء القمح في العالم الكل و المشكل الثاني هو سرقة الكواشة إلي يبيعوا لجماعة المطاعم في الفرينة المدعمة متاع الخبز.