الاثنين، 16 جوان، 2008

مهزلة حملة 15 جوان ...قتل ثاني لهشام ؟؟؟


كنت ننتظر بعد تصاعد الوتيرة التدوينية للوخيان الكل اللي تضامنوا مع اهالي الرديف خاصة بعد سقوط شهيد ثاني انو باش تكون اربعينية الشهيد هشام بن جدو حملة تلقائية وجادة تزيد تفضح المتسببين في ازمة الحوض المنجمي خاصة بعد تطوعوا اوخيان مشكورين وحطوا البانيار متاع المرحوم على مدوناتهم معاه يومية تشهد على ذكرى سقوطه حتى ترسخ في ذاكرة العباد الكل ها الذكرى الاليمة وتكون مناسبة للمطالبة بتقديم الجناة للعدالة كيف ما طالبت بيها منظمات حقوقية تونسية ودولية واحزاب معارضة ومؤسسات المجتمع المدني ( كان عندنا بلحق مجتمع مدني لاني نتصور ان المؤسسات هذية يخلقها الوعي بالحقوق وتكاتف جهود الناس النيرة في البلاد ) قلت كنت نتصور انو باش تكون حملة عفوية بمناسبة اربعينية هشام تفضح بالتصاور والفيديو والمقالات النارية كل الجناة .لكن ماراعني انو دخلت علينا برازيت شوشت التوجه هاذا وحرفت مسار التدوين يوم 15 جوان لنصرة الاسلام ....هكة لاطاح لادزوه وكانو الكفار ظهرو فجاة في تونس والا هما على ابواب السلطة او ان اللي تسبب في ازمة الحوض المنجمي هما كفار او كانها الانتفاضات اللي وقت في الرديف والا ام العرايس هي انتفاضات اسلامية حركتها ايادي حماس او حزب الله ( اشكون يعرف ) او عندنا جرايد ( تتمتع بحرية الاعلام ) ظهرت تصاور جديدة مسيئة للرسول ( واحنا ما في بالناش ).لذلك اقول :
* ان الفكر السلفي التكفيري لحسن الحظ تولد ميت وماعادش يلقى مناصرين كيما يتصورو برشة ناس بدليل حتى حركة النهضة متاعنا نددت بيه بل وراجعت مواقفها من مسالة العنف على حد علمي .
* ان حكاية دار الحرب ودار الاسلام ماعادش توكل الخبز اليوم لان كل اشكال الانغلاق ورفض الاخر ما تنجم تولد كان عودتنا للكهف المظلم اللي حبو يرجعونا ليه جماعة طالبان ( رفض التلفزة والتصوير وحجب المراة ويمكن وأدها خلاص ...) وهذا ماعادش يمكن قبوله حتى من التكفيريين انفسهم لانهم يعرفو ان الانظمة الغربية العلمانية هي اللي اعطتهم غطاء وحق اللجوء واعطتهم الاذاعات والتلفزة والصحف باش يعبرو بحرية على افكارهم ( لدرجة ان لندن بداو يسميوها لندنستان ) وان النت هي ابداع غربي اللي بدات اليوم النافذة الوحيدة لبن لادن باش يبث فيها سمومه للناس .
* ان الاسلام ماهوش في حاجة الى اشكون يدافع عليه اليوم لانو اذا كان نجح قدام حملات تبشيرية منظمة باش يصمد يظهرلي ماهوش في حاجة الى دعاة واصحاب فتاوى تطلع علينا كي الفقاقيع كل يوم واحنا نعرفو مدى ارتهان الناس هاذوم للغرب ( نتذكر هنا مثلا سنة 1924 لما كتب الشيخ علي عبد الرازق كتابه الاسلام واصول الحكم شنوا عليه وقتها بعض شيوخ الازهر حملة تكفيرية وربطوا الكتاب بعلمانية كمال اتاتورك اللي طبقها في تركيا عام 1925 ورد عليهم علي عبد الرازق بكون الناس هاذوم واولهم شيخ الازهر كانوا عملاء للانقليز وليس همهم من الاسلام شيئا . وشوفوا توة تركيا العلمانية وين واحنا وين ؟؟؟...وهاذا يذكرنا شوية بعلاقة بن لادن بالمخابرات الامريكية ايام الحرب ضد الروس في افغانستان ؟؟؟) . فمابالك اذا كانت الحملة هاذية من ناس مازالت تمارس في المراهقة السياسية ؟؟؟
* ان الحملات هذية مشبوهة وجات في توقيت مقصود القصد منها التشويش على المدونين وتحريف مسار مواضيعهم الجادة نحو الانزلاق الى السب الرخيص والكلام تحت الصرة وهاذا يذكرني بالجامعة كيفاش ساعات تبدا العباد قريب تتفاهم على شيء في اجتماع عام حتى يطلع عليك " بربوز " سامحوني في الكلمة يفسد اللي تعمل الكل وتاكل بعضها بالبونية وتظهر السكاكن ...ويلقى البوليس مجال للتدخل ويهز العباد للحبس والا ريجيم معتوق ؟؟؟؟
* في الاخير نشكر كل الاوخيان الي كانوا فايقين ماشاركوش في الفعل ورد الفعل خاطر وقتها باش تتواصل الحملة وماعادش تسلك على خير ( كي ماسمعت انو البعض هدد بقرصنة بعض المدونات التكفيرية كيما يسميها وهذا ما يفرقش برشة في نظري على قطع الراس وهو حد الكافر عند العباد هاذي ).
* كيما نطلب من الاوخيان الكل يمشيو خطوة لقدام ويفكرو برزانة في ما هو مشترك ونعاود نطرح اللي طرحتو في تدوينة سابقة علاش لا ندوة كبيرة على واقع التدوين في تونس وخلينا نستفيدو من اوخيانا المصارة والمغاربة وحتى السعوديين اللي هوما للاسف متقدمين علينا باااارشة .
وانا في انتظار تفاعلكم مع هذه التدوينة والمقترحات الي اقترحتها من دون سبان وراني باش نحي كل تعليق رخيص ونندد بصاحبو ؟؟؟

هناك 10 تعليقات:

titof يقول...

السلام سيدي الفاضل
ميسالش ماو ندافع على روحي ضد مراه تجني
انا مكفرت حد
وكي كنت نحكي ديما نقول حزب السراديك فهل انا المرادف لكلمة سراديك في قواميس اللغة عندكم هو كلمة كافر
ثم اليس من العيب تلفيق اتهمات باطلة
متى ادعيت اني سأضرب المدونات الكافرة
كل مافي الامر اني هدتت المدونة التي شتمتني في شخصي
و تلااجعت في وقت لاحق
الحملة لم اكن انا المظم الوحيد لها بل كان هناك ستة مدونين معنا
انت ترى ان قضية قفصة هيا اولوية انا
من حقك ذلك
انا ارى ان لي اولويات اخرى بخلاف قفصة
و لاتهام الي احنا تحرك فينا جهات اخرى
الى متى ستظل اللغة اليسارية تحافظ على ايقاعها الرتيب القاتل
سيدي الفاضل
سواءا في مدونتي اومدونة عمروش او الحنكيش او حتى حشيشة لم ندعو الى الحجاب و لا الى اقامة دولة اسلامية فقط قلنا لا تشتمو لنا ديننا
تسائل انت عن تونزي بلوغ
ساقول لك سيدي الفاضل الذي احترمه كثيرا
لقد التحقنا بتونزي بلوغ منذ اربعة ايام بعد ان تم اقصاءنا باعتبارنا برازيت
وكأن تونزي بلوغ من حق اشخاص و المدونا ليست الا حكرا على الذين يوافقونكم الراي
سيدي الفاضل قبل ان نتحدث عن ندوة تدوينية علينا ان نعرف المدونة
المدونة يا سيدي الفاضل هي ركن شخصي يكتب فيه الانسان ما يعجبه شرط الا يعتدي على الاخرين فكوني لم احي 40 هشام فهذا حقي
و ليس المدونون من سيقنع الحكومة بتسليم الجناة
و السلام
الرجاء مراجعة بعض النقاط في هذه التدوينة ان كنت حقا تدعي انك تبحث عن الحقيقة فلا يجوز تلفيق الاباطيل
و اعتذر منك سيدي الفاضل
بالنسبة للوقت المشبوه هاك انتم زادة تِمنو بنظرية المؤامرة

3amrouch يقول...

اخ ابو ناظم
كان باش نوليو نحكيو بلغة توقيت معين وعباد حبت تشوشر لغاية في نفس يعقوب ماناش
باش نقدمو ربع خطوة
بصراحة موش تولي مبالغة انو نقولو انو فمة شكون مندس بيناتنا وحسبها قبل بجمعتين باش اطيح بالضبط مع الاربعين؟
على كل هي فرضية تكون محتملة ولكن اخ ابو ناظم معرفتنا بالنظام تخلينا نستبعد احتمال كهذا لا لشي الا كونو جبان ومايخافش موش مجرد كتابات باش تحركو ،ماتحركش وقت زهير رحمه الله وجماعة موقع "تكريز" والسيد سليم بقة متاع الاوداس باش تحرك شوية مراهقين وهواة موش عارفة حتى فاش تكتبوكيما قلت انت مراهقة سياسية
اخ ابو ناظم تحب نتفاعلو مع الي كتبتو انت حاضر اما فقط اصبر عليا واقرالي للاخر:
انا انسان نعتبر نفسي مستقل وماعندي حتى حزب ننتميلو ولا نخمم باش ننتميلو وحتى اشاعة خوانجي راهي باطلة فقط نتكلم كيف نشوف لعوج واكهو
كيف تقلي انت حتى حد ماتفاعل ،نقلك رانا بكلنا وخيان وبكل ولاد بلاد وحدة مهما تفرقنا ومهما بعدنا نقعدو ديما نحبو اللبلابي والهريسة والكسكسي بالعصبان اذا كيف انسان يجيب فكرة وحتى لو ماكنتش باهية ماتقعد كان اجتهاد ينجم يكون صحيح وباهي كيما يكون ماهوش جدي
كيف انا حكيت لهنا
http://scoubidou1.blogspot.com/2008/06/blog-post_12.html
وتكلمت قبل يوم من المسيرة الي كان من المقرر تتعمل في تونس وبالمناسبة ماعنديش اخبار اش صار فيها ،عاد علاش حد ماجاوبني؟ علاش حد ماقالي فكرة باهية ولا فكرة موش باهية؟ ولا على خاطر جات مني انا"الظلامي" الي يحب يمتطي القضية ويسيسها لاهدافو هو؟
تنجمش تجاوبني؟
و لا لازم نكون من المقربين باش تلقى كتابتي بعض الاهتمام وتكون جديرة بالمتابعة
كيف كتبت لهنا نص وادعوك لقراته

http://scoubidou1.blogspot.com/2008/06/blog-post_07.html
لم اكتبه نفاقا ولا استعمالا ولا للوصول لبعض الغايات او من باب هاني شاركت ،لا اخ ابوابوناظم فمن ذاق اليتم وخبر وقع الموت على وجه امه لن يجرو على العبث بتلك مقداسات واستغلال حرمة الموت

علاش تمشي لبن لادن ولجماعة الازهر هاتو نحكيلك على شبه المعارضة متاعنا
شخصيا حضرت في اجتماعات واتكلمت مع برشة عباد عندهم اسامي وذلك من باب الفضول اولا وفي الاخر انسحبت او هوما بردوني كيفكيف قلي علاش؟ على خاطر تجرات وقلتلهم رانا فدينا من حكايتكم انتوما وعم الراجل هاو سرق هاو نهب هام عملو ،نهار ودونو وهوما مايحكيو كان عليه وعلى عائلتو،قلتلهم ياناس فكونا كلنا نعرف خمجهم اعطيونا انتوما البديل ،اعطيونا الحل،قولولنا اش تنجمو تعملولنا انتوما كان مشا هو؟ ماعجبهمش لحديث، علاش كيف تكلم انسان كيما طارق ندراى شكون تي هذاكة متاع جمهورية الغد وقدم اراء معقولة وجديرة بالنقاش وقاللهم نجمو نسلكو وحدنا بلاش امريكان ولا فرنسيس طفاوه واتهموه بنقص المستوى التعليمي متاعو و"حقروه"
شوف تعاليقي لهنا واحكم
صديقي
تعاملنا مع بعضنا كان في قالب الاحترام
من البداية احترمتك وشجعتك وكنت معاك
موش معقول هذا راو
البوست الي قبل هذا وحدك وحدك حكيت وحطيت سيوفة وعملت هيلامان
وضحتلك وتفاهمنا
علاش راجع توا تشعل في النار؟
اولاد صغار تو نحنا؟
في الروضة ؟
تي شنوة توة؟
انا ضد الشخصنة هاذي وضد التجريح وضد ثقافة شكون يسلخ صاحبو اكثر وشكون سليط اللسان
حقيقة ماعجبتنيش في الوقت الي لازم نكونو يد واحدة وخاصة انك من الناس الي تعرضو للحجب ترجع وتولي تعمل هكة؟
اعطيني تفسير وحيد مقنع؟
تبحث عن الاثارة بالكشي؟
تعرف انو اليوم حكاو عليك في تونسية واتش وحطو الرابط متاعك انت بجنب الاخ سمسوم ورمضان....تتخيل في مخك معناه واحد يلقاك بجنب سمسوم الانسان الي يحارب في الحجب عندو سنين ويكافح يجي عندك يلقى سبان وتيتوف وشلاكة وكلام مايصلحش؟
موش قلة احترام هذا للناس الي معاك؟
المرة الفارطة عملت نص ونقدت فيه كيفاش الشعبة موجودة في كل بلاصة والمستشفى الوحيد بعيد ....رائع نقدك كان صديقي ذلك اليوم
نزيد نمشي معاك لابعد من هكة تتخيل انت كان عمار يبرر موقفو من القطع والحجب وينشر تدوينتك ويستعملها حجة باش يوري الي هو عندو الحق نظرا لتدني المستوى؟؟
رد بالك اخ جني راو من اليوم الي حجبت فيه مدونتك وسلط فيه عليك الضوء لم تعد الصاحب الاوحد للمدونة بل اصبحت ملك كل حر وكل انسان صاحب قضية...
لا تتسرع صديقي مجددا واعلم ان لكل جواد كبوة
لم يعد لدي مااقوله
اعلم انني ساعود هنا مجددا لانك طيب وسترجع طيبا
والسلام
اخوك الافتراضي
شوف اش زدت قتلو
جن الجنون
هل رايت ياصدقي كيف اصبحت رمزا
فمدونتك لم تعد ملك واصبحت مفتوحة للجميع ليقراها
فلا تفسد كل شي باستفزازات جانبية انت في غنى عنها ولست بحاجة لاثارة مجانية رخيصة
هيا بوس خوك تيتوف راهو ماعندو ماعملك ولا نجعل حوارتنا كلها مشخصنة وكله سب وتقريع
هذا باش نثبت اني راني لانلوج على حروب صليبية ولا على قتل الكفار راني فقط طلبت انو الي عندو راي يعرف انو يجرح صاحبو يحتفظ به لنفسو لا اكثر ولا اقل، لاقلت حي على الجهاد ،لاقلت شي.
والحاجة الي اهم اخ ابو ناظم هي نصفيو قلوبنا ،وماعدش نخافو من بعضنا ،راهو عندنا خوف معشش فينا شوف التعليق هذا
يا جماعة ردو بالكم من بعض المدونين الي عاملين فيها مدافعين على الاسلام وهوما ما فاهمين منها حتي شئ علي خاطر ممكن ياسر يكونو حنوشة وقاعدين يكشفوا في المدونين اللي عالليمين وعاليسار وخاصة اللي عندهم ريحة سلفية.والحاكم متاعنا ما يصعب عليه شئ و ما نستغربو منو حتى شئ
رد بالك يا عمروش راهو تيتوف والحنكيش ما يطمنوش
ثقافة خوف معشش
صدقني والله الحكاية الي باش نقولهالك صحيحة،عندي عمي جاء حذاي في عطلة ،عاد نحكي انا وياه حكيتلو نكتة على عم الراجل والله تفجع وتلفت وراه وقالي اخطانى اخطاني....تتخيل في مخك انت حتى في بلاد الناس ماكلنا الخوف.
شوف تدويناتي الكل وتعاليقي كان تلقاني حرضت على حاجة ولا هيجت لعباد بالعكس
على كل نعاودلك راو الي يحب بلادو يعاونها بصمت ،شخصيا نجم نكون اشجع الشجعان بما اني في بلاد الناس و"مختفي" خلف اسم شهرة يعني حتى حد لا عم الراجل ولا ازلامو ينجمو يعملولي حاجة وحتى حد مايعرفني شكون ورغم ذلك نعاون بصمت ومانحبش الاثارة المجانية.
انا معاك كيف تقلي صارت لخبطة وتبلبزت لحكاية ودخلت بعضها ام تقلي مهزلة تولي حطيت الناس الكل في طرف واستثيت البعض
ولهنا نذكرك انو فما شكون سبنا بكلام زايد كيف الي مسمي روحو اسماعيل ولا السيد الي حاطط اشارة بيدو كتدوينة.
على كل وددت لو كان زدت حكيت معاك اكثر على المباشر لكن ننتظر تفاعلك على الي كتبتو ونرجعلك.
تحياتي

ahmed يقول...

انا متاكد الأن ان كل العملية محاولة فشلت لتحويل انظار المدونين و القرّاء عن المحاكمات الجارية في الحوض المنجمي.
بصفتي متابع لكل ما ينشر ادعو كل الأصدقاء المدونين ان لا يجيبوا اصحاب هذه الحملة المشبوهة و ان يعاودوا مد القراء بكل ما يتحصلو عليه من اخبار الحوض المنجمي

abunadem يقول...

titof
انا ما قصدت حد بالاسم ولكن تبعت بعض اللي قالوه الوخيان وتعليقاتهم ثمة شوية سبان وتهنتيل زادة ما يليقش بينا اما قريت رد عليك من ماني على الرابط هاذاية اشار فيه على ما يبدو على تهديدك ليه بضرب مدونتو والمدونات اللي ما تعجبكش
http://manichaeus.blogspot.com/2008/06/blog-post_10.html
والا وقت اللي قلت للاخت ارابيكا هاالكلام في البوست متاعها هنا
http://fatma-arabicca.blogspot.com/2008/06/blog-post_09.html
يقول...titof

الرد موش باش يكون تدوينة ومنا لانطلاق الحملة متقدمش اعتذار تو تشوف كلمة ماني تصح ولا لا تي تيلكوم قاعد نكور بيها تو عندي عام
خلي المدونات انا مجبدكش انتي قاعدا تحاول تدخل روحك وتسبب
الرد باش يكون موجع برشة راو
خمم مليح وفي عقلك

انا ما نتجنى على حد ومانرميش الناس بالعيب.
ولكن هذا موش مهم اللي قصدتو انا في تدوينتي اليوم هو ان من حق كل انسان يكتب اش يحب اما كي تكون حملة منظمة موش كيف لان الحملة عندها ما يدعولها وانت راك ريت انو الحملات الكل ديمة عندها اسباب ومقاصد والا ماعادش تكون حملة وانا تسالت على اسباب ومقاصد الحملة هاذية توة وفي التوقيت هاذا اللي كنا نتظروا باش نكثفوا الجهود من اجل حملة اخرى فرضت روحها علينا اليوم اما كونك ما توافقش تكتب على هشام من حقك زاده ولكن كان بالامكان تاخير حملتكم لنهار والا حتى اسبوع اخر والا تربطها بحدث عندو دلالتو باش تجي معاك العباد الكل والا كيفاش تكون حملة ناجحة هي.
اما الاباطيل راهي مش من اختصاصي يا سي تيتوف وتنجم تقرالي وتثبت كاني نتهم انسان بالكذب ووقت اللي نقول بربوز والا مراهقة سياسية والا نحكي عن علاقة طالبان والا بنلادن بالسي اي اي هذه حقائق مش اباطيل ؟؟؟؟
انت مازلت جديد ومندفع للتدوين نحيي فيك هاالروح اللي نتمنى تكون في ما يجمع لا في ما يفرق ؟؟؟

titof يقول...

صدقني سيدي الفاضل مكنتش نعرف الي البارح
الاربعنية متع هشام عل الاقل كنت تنجمو تنبهونا
على كل مننكرش الي انا وقعت في التجريح
و الاعتدءات المجانية على بعض المدونين
لكن انا هددت مدونة بركة
وتراجعت في وقت لحق لانها كانت لحظة غضب
وبالنسبة للحكاية بدات منهارت كان تتذكر وقت انتي قلت الانسة متقصد حد
من وقتها بدات الامور تتازم ووصلت اي وصلتلو
صحيح الحملة حادة بعض الشيء عن اهدافها اما مكنتش مهزلة
لانو زادة منساوش الطرف المقابل الي هو زادة وقع في الاعتدءات المجانية
على كل سيدي الفاضل انتي تعرف الي انا نحترمك برشة رغم الاختلاف الكبير بيني وبينك في الافكار
وسأضل مخلصا كما كنت مخلصا لمدونتك
و السلام

abunadem يقول...

3amrouch ...
صديقي انت راك مدون قديم والمفروض بديت تفرق وتميز بين المدونات والمدونين قريت في ردك خلط كبير بيني انا وبين مدون اخر هو جني الزبالة انا ماحطيتش سيوفة وما حكيتش على الشعبة والسبيطار وما قصوليش مدونتي يظهرلي تقصد زبالة هاهو ارجع لهنا خاطر المدونة متاعو تقصت
http://tn-blogs.com/?feed=663
اما مسالة التحريض انا ماقلتش انكم تحرضو وانما تسالت على توقيت الحملة هاذي لان الحملة يا عمروش وانت قديم وتعرف عنها اسبابها وعندها اهدافها فتنجمش تقولي اش ثمة جديد يدعو لها الحملة توة وعلاش اخترتو 15 جوان اللي انت تعرف ان العباد حاطة بانيار متاع هشام وباش تعملو اربعينيتو .
انا معاك يا عمروش في ما يجمعنا موش يفرقنا كون اسلامي يساري قومي والا اش تحب تكون احنا مجرد ناس افتراضيين ما نعرفوش بعضنا نتقابلو كي ماقلت قبل في السميق - الحد الادنى - التدويني اللي يجمعنا ومانيش مستعد نسب والا نشوه والا نتجنى على العباد .
كان ثمة حوار فكري رزين اهلا وسهلا
نتناقشوا في المسالة الدينية والا علاقة الدين بالدولة والا اي موضوع مرحبا من دون ما نجبدو السلاسل والسكاكن على بعضنا .

abunadem يقول...

احمد صديقي هاذا الصحيح
نرجعو لموضوعنا خير .

3amrouch يقول...

اخ ابو ناظم
لم اخلط بينك وبين زبالة كان ذلك تعليقين وضعتهم عنده في مدونته ونقلتهم اليك اليوم لتقراهم وتعلم انني كنت من الاوائل الذين نادو بالتهدئة
فما رايك في مبادرة وضع شعار في الملابس؟فليست الانترنات في متناول الجميع.
اقرا ماكتبته انا اليوم فردك يهمني
http://scoubidou1.blogspot.com/2008/06/blog-post_16.html

abunadem يقول...

اه سامحني انا فهمت بالغالط توة فهمت
مافرقتش بين التعليق والتعليق على التعليق الامور واضحة
وتستمر المسيرة

Bachbouch يقول...

Thank you Thank you Thank you!!!
wallahi ya3tek essa7a, je pensais la meme chose et j'etais emu par le "tahmish" dans le blogosphere Tunisien. J'ai meme pas voulu ecrire sur ce phenomene pour que manzidech 7atta ena nod5ol dans ces conversations idiotes. And I would like to send a message to everyone who blogs for or against a religion: Religion is something personal that you should keep to your self!