الجمعة، 20 جوان، 2008

بعد الهدنة ضحية اخرى للجلم ...ونيران صديقة ؟؟؟؟

بعد الهدنة ضحية اخرى للجلم ...ونيران صديقة ؟؟؟؟
بعد الهدنة اللي شهدتها الحركة التدوينية على امتداد هذا الاسبوع من طرف واحد ...وخاصة بعد ما كنا نتوقعوا ان الضربة الاستباقية باش تكون هنا ...قامت الكات كات بغارة خاطفة وغير متوقعة على مدونة قفصة المناضلة ( واللي بالرغم من تماسك الجبهة الداخلية للقفاصة اللي تلافت الضربة بالسرعة اللازمة ) وبعد تنفس المدونين الصعداء على انفراج الازمة سقطت للاسف ضحايا جديدة ولكن المرة هاذي بنيران صديقة بسبب ضعف الاداء التدويني وانحدار مستوى النقاش الى مراتب باتت تنذر بالخطر خاصة اذا نعرفو انو واحد من الضحايا هو من اعرق المدونين واقدرهم واكبرهم خبرة ناهيك عن جرح مدون اخر بجروح خطيرة استوجبت نقله الى جناح السرعة الى غرفة العناية المركزة وان حياته تتوقف على ضرورة اتفاق الاطراف التدوينية كافة على الارتفاع بمستوى التدوين بل وعلى ضرورة عقد ميثاق المدون يشرف عليه الاخوين حسين وطارق ويمضيه كافة المدونين على ان يدخل حيز التنفيذ بمجرد وضعه كبانيار في كل مدونة :
يلتزم بموجبه المدون ب :
  • السهر على جدية المواضيع التي يتناولها .
  • احترام معتقدات وافكار كل مدون .
  • عدم الاعتداء الاخلاقي والفكري على كل مدونة وصاحب مدونة ( حق الملكية الفكرية ).
  • العمل على بث ثقافة الاختلاف ولكن بروح اتحادية تضامنية .
  • ان يلتزم كل مدون بحماية زميله المدون عند الحجب بنشر اخر تدوينة له .

هناك 11 تعليقًا:

Gouverneur de Normalland يقول...

برافو ابو ناظم

انا نضم صوتي لصوتك

ونتفق معاك على النقاط الي حددتهم في الميثاق

Nakhlet Oued el-Bey يقول...

علاه 'جدّية' بش تردوها شريط أنباء قنال تونس طبعة ؟
باقي النقاط مقبولة أمّا لوّح علينا هالجدّية ...

never done يقول...

m3a nakhlet awled el bay, el jidya mouch lezem, el be9i ena m3akom

abunadem يقول...

مايسالش نبدلو كلمة الجدية بالطرافة
طرافة المواضيع

khanouff يقول...

Désolé de ne pas être d’accords, non à un min et un max, non à toutes formes de bornages, formatage, non à l’emprisonnement, non à une quelconque forme de moralisation.
Il faut que le champ soit libre à toutes les expériences, le monde est ainsi fait, des organismes unicellulaires aux formes les plus complexes ainsi devrait être aussi les productions intellectuelles et à chacun d’aller puiser là ou il lui semble bon et trouver son bonheur.
Qu’un agrégateur s’impose des rêgles internes de conduites, c’est sont affaires, mais il nous ai pas demandés, nous bloggeurs, de nous transformer en des « moralisateurs » de cet espace naissant, car il est à ces premiers pas et je suis aussi un de ces premiers contributeurs à travers d’autres blogs disparus maintenant.

3amrouch يقول...

اخ ابوناظم
انا نتفق معاك في الفكرة ولكن عندي احترازات
السهر على جدية المواضيع التي يتناولها ....
هذي صعيبة شوية كان موش مستحيلة لانك اولا لازم توضح مفهوم الجدية وشنية حدودها زادة,بمعنى مى مدونات ذات مستوى لكن تتعاطى مع امور ذاتية للمدون كان يحكي على حياتو الخاصة والا على كيفاش قضى ليلته واين قضاها ماتنجمش من راي تمشيو وتمنعو وتقلو راو اطوار سهريتك في الكلايبسو ماتهمناش وماهيش جدية،زادة ماتنجمش تجبر الناس الكل باش تكتب في السياسة ولاتكتب في موضوع معين وقتها تصير تخمة وتقع عملية فدة وزيد هذا ودونو نظن انو الاخوة حسين وطارق موش باش يقعدو شادين قارد ويحلل في كل نص هل هو جدي ام لا.
احترام معتقدات وافكار كل مدون:
كنت ناديت بالشي هذا من الاول،لكنها معادلة صعيبة لازمتها برشة نضج ولازمتنا زادة نبداو مؤمنين بالكلام الي نقولو فيه ،احترام الاخر وعدم التعدي عليه ينطبق على كل الاطراف تحب تحكي في الدين,احكي على روحك ماشدك حد لكن في نطاق المعقول،انت شخصيا كيف عملت تدوينة على الاخطاء النحوية في القران جاوبتك بالي نعرف ومشى كل واحد على حالو ،قعدتش نسب فيك ولا نكفر فيك ،لا بتاتا هذيكة فكرتك وانت حر،على كل انا شخصيا منسب حد مايستهلش.

Bel Malwene يقول...

خويا أبو ناظم مبادرة طيبة و أنا نضم صوتي ليك ... و هاني قاعد نحضر في مسودة متاع ميثاق تدويني نشاله ننشرو في أسرع وقت باش نتناقشو فيه ... و باش نستسمحك و ناخو من عندك هالنقاط الي قلت عليهم أنتي...
شكرا

3amrouch يقول...

بالالوان
توليش بلحق الحكاية ميثاق ومعاهدة وتناقشو فيه زادة
ومبعد كيفاش نمشيو نصححو في البلدية وتعريف بالامضاء
يزيو بربي
موا كل واحد يحترم الاخر ويكتب اش يحب
تعرفوش كيفاش
انا اندد بهذه المبادرة متع الاخ ناظم وارى انها للتفرقة ولتضيع الوقت في النقاش حولها
اظن ان هناك جهات مشبهوة تحبنا مانحكيوش على الرديف ونقعد نخسرو الوقت للاتفاق على ميثاق معاهدة (نفدلك راهه والله نفدلك...دواه كان الضحك)كما تدين تدان ياابوناظم هههه

abunadem يقول...

khanouff ...
المسالة مجرد اقتراح باش ما يصيرش تجاوز لحدود متفقين عليها اما مش بالضرورة يكون ميثاق بالرسمي اذا تشوفو هاذا حد من حرية التدوين

abunadem يقول...

3amrouch ...
تنجم تبدل كلمة جدية بكلمة طرافة المواضيع الصيغة نتفاهمو فيها مش مشكلة المهم في حد ادنى "سميق تدويني" كيما سميته سابقا نتفقو عليه .

abunadem يقول...

Bel Malwene...
نستنو اقتراحك ونتفاعلو معاه
اما نتفقو كان المسالة تبقي اعتبارية او تولي بالرسمي بانيار يتعلق في المدونة.