الأربعاء، 18 جوان 2008

يا جماعة يظهرلي الجلم متاع عمار دمر ؟؟؟؟؟


يا جماعة يظهرلي الجلم متاع عمار دمر ؟؟؟؟؟
اكيد فهمتو المقصود بعد ما هبط صديقنا عاشور الناجي رسالته في التدوينة الاخرة واللي والحق يقال فاجأنا بيها الناس الكل لجرأتها وصدقها انتظرنا الناس الكل انو سي عمار باش يخدم خدمتو ويقوم بتطهير البلوغسفير من ها الحفرة الرقمية الجديدة ولكن للان ما صار شيء وانا كل مرة نجي نجري للحاسوب وندخل نجري لمدونة صديقنا عاشور نطل عليها ماهي ما ضربهاش الجلم ونتفرهد كي نلقى الامور كيما خليتها .عاد تساءلت بيني وبين روحي :
  • ياخي زعمة عمار في كونجي النهارات هاذي بعد ما بدات الامور تركح في الرديف والتعب اللي تعبو مسكين المدة اللي فاتت وهو خدام ليل ونهار ؟
  • والا زعمة الجلم متاعو من كثر ما خدم المدة اللي فاتت دمر وما عادش ينجم يقوم بوظيفتو ووقتها لازمو ماتريال جديد من اليابان خاطر سلعة الشنوة فالصو ؟؟؟
  • والا بالكشي الراجل بعد الحملة اللي عملوها عليه الجماعة حشماتو على روحو وقال بره سيب علي خلي الناس تفرغ اللي في قلوبها لا ترصيلي في في ثورة جياع على البلوغسفير ؟؟؟
  • والا زعمة يستنى في موجة التسونامي تهذا بعد العركة الاخرة بين اللي يتسمو والا ما يتسماوش ( هاهو باش ما تقولوش نسب ) كيما ما سماها خونا كلاندو ؟؟؟
  • والا بدل التكتيك وبدا "ديمو "( يعني ديموقراطي بلغة توفيق الجبالي ) وخباه ها الجلم للابد ؟؟؟ على كل هذا نتمنوه يصير ؟؟
وما نتمنوش لمدونة خونا عاشور او اي مدونة اخرى انها تتقص لان الاقصاء والقصان والحجب ما تنجمش تتاسس الا لذات منغلقة ولعقلية "الانا وحدية "اللي ماتقودنا الا لل "ديما"(غوجيا ) وهي ضد ال "ديمو " اللي هي ال " دينامو" متاع الحياة العصرية والامم المتقدمة .


هناك 5 تعليقات:

غير معرف يقول...

T'inquiete pas, Ammar rahou fiddoura ibagues fina ilkol :D

غير معرف يقول...

غالط يا سي ابو نادم المتريال اللي يخدم بيه عمّار404 موش شنوى بل من امريكا "سمارت فلتر" و اسرائل "سيسكو سيستم"

الحلاج الكافي يقول...

أشنوة...حي يكوي ..ميت يكوي..عمار هاو خاطيكم...أخطــــوه..

عاشور الناجي يقول...

شكرا لإطرائك أولا أبا ناظم

:))

بيناتنا أنا بيدي موش فاهم
!!

ياالجماعة نقصوا من البهامة


ياأنا ما تجاوزتش الخطوط الحمراء و زيد بره ميتين ولا حتى ألف واحد قراه الموضوع ؟ طز أما كان بلوكاو المدونة وقتها يوليو ألوف سمعوا بيها


نتمنى يكونوا فعلا بداو يفهموا أما احنا موش لازم من جهتنا نتخيلوا عملنا عملة و الا حققنا نصر



و المهم ثقافة النقد اشك و الإختلاف والحوار هي الي تكون إضافتنا


تحياتي

غير معرف يقول...

عمــــّار ...تونسي أمعقّد

إحب الناس تبعثلو رسائل تتراجــــاّه فيها ، باش إزيد في الفيتاس ! إموت على الموضمات و التصّفيق على حافة الطريق ، وقت ألي ماشي باش يعمل غزوة من الغزوات متاعـــــــــــو ...في الواقع خرجات متع صيد بالرّصاص الحي ...ها الأيمات ! دارت عليه في قــــفصة و الرّديف و فريانة و قالـــو : ساقيك ما عاش إطحتها هوني ! رجعت للعاصة خايب ...و ما لقاش لا جواب و لا ناس إتصّفق ...كرّز : قال هــذا الكل من المدّونين ...حالين علي حرب ....و خلّو الناس إتفيق و تفهم أش صاير ...إنزل عليها ذبيحة بمـــــــــــوس دامر ...

كي إتحبو عمـــّار يرتاح و إشد دارو : لازمكم يا جماعة تبعثولو برســـائل ، إتجددو فيها مناشدتكم ، إنو يترّشح لعام 2900 و يقعد شوفيــــــر بدون برمي موش مشكل ! خلّوه يطمان شوية ...شهر و إلا شهرين ...يستانس بالفـــــــــــــــولون ...يبعد على حافة الطريق ...إولي يعمل كلينيتون وقت ألي إدور ...بالغربي يتعلّم الحجامة في روس الأيتامى ...الرّأجل و بعد عشرين سنة من الهزان و النفضان باقي ما هوش إمصّدق بالي هو الرئيس و المعلّم الكبير متع الكيـــــــــاس !

وقت ألي إتشوفوه بدى إسيب في إيده و إخلي الفـــــــــــــولون و حدو ...و 404 تجري إمسقمة ....ثمة تنزلو عليه ....قصّة عربي في وسط الكياس ...موش لازم إتكون عندكم كورفات و إلا فــــــــرّاري ...لازمكم حاجة وحدة ...وقت ألي إتجيـــــــــو بالجنب معاه !إتبسمو و إقولو ...يا إمعلّم ...إنت وحدك في الطريق ...في اللّحضة متع حطّت إيديه على الفـــــــــــــولون و تكشيرة إنيابو ....عطيه الحس ...بـــــــكو دي فولون ...الياشي كان ما إتقلبتش ...إتشد الطريق العربي ...و بالحرام على توصل لبــــــــــر!

توضيح :

بالنسّبة للمدّوننين ألي قدّمو الأستقالة متاعهم ! و قالو بأن الفضاء التدوني ما هوش في المستوى باش الواحد أواصل الكتابة ...حبيت إنقولولهم ....التوانسة هاذوكم هوما ! فيهم الباهي و فيهم الخايب و فينـــــــــا الميردا و فينا العسل ...وقت ألي إطبقو قانون الدومينونس ...نفهمو بالي على قد ما ثمة أقلام صحيحة على قد ما الفضاء هذا أولي صحيح ...و على قد ما ثمة أقلام ضعيفة الفشاء هذا أولي ضعيف ...إذا إنتم تعتقدو في أرواحكم أقوياء ...فلا بد عليكم من تواجهو الخور ...بالحكمة.... و الدّوام ينقب الرّخام.
حرّية التعبير ...راهي ما هيش ساهلة ...و ما تعطيش لكل واحد خاتم على قد صبعو !!!الخاتم المدّون يصنعو وحدو بوحدو ..بالعمل الجاد و المواضيع الشيقة و المسؤولة ...موش كل وين نلقو نـــــــــــص ما يعجبناش ...إنقولو بطـــــّلنا ....نغظبو و إنقولو : هذا موش تدوينن. العقل إقول لا بد من المواجهة الميدانية و على تراب من أراد ذلك. الحياة ...كونبــــــــــــــا ...الكتابة نفسها كونبـــــــــــا ....خلّو كل فول زاهي في نوارو : و ألي إحب يكتب في مواضيع تافهة خلوه يكتب ...ليس حتما عليكم لا باش تقرولو و إلا باش إتعلّــقو عليه ...خلّوه ..توه يطفى كي الشمعة ....في يبقى في الواد كان حجرو!!!!!

قاسم المدّون الجــــــــــــــاي !!!! تحديا لعـــّمار
إسمع ...يا عمّار ...هات دبابة ضدي ، ما إتلعبنيش
الكات كات متـــــــــــــــاعك ....................