الخميس، 4 سبتمبر 2008

الحجب يطال حتى الاعمال الدرامية ...حجب مسلسل مكتوب ؟؟؟


يظهرلي الخبر تحدثت عليه بعض المواقع ( هنا مثلا ) ونقصد حجب مسلسل "المكتوب " اللي بعد ما وافقت عليه وزارة الثقافة وصرفت عليه من المال العام ظهرلها ومن دون سابق اعلام باش توقفو في الحلقة الاولى متاعو وحتى قبل ما توفى الحلقة هاذية اللي قصت عليها تلفزتنا الحنينة كعادتها بنشرة الانباء ومن بعد بالاشهارات وما كلفتش روحها حتى باش تعتذر لهاك البوهالية اللي يتفرجوا فيها ...قالك يا سيدي المسلسل فيها مشاهد خارجة عن الحياء العام وفيه شوية جراة زايدة ...تي ماو تعرض عليكم قبل وعطيتوه تاشيرة قبل ما يتعرض ؟؟؟ كيفاش خذاها التاشيرة ؟؟؟وعلاش بعد ما صرف فلوس توقفوه ؟؟؟؟وزيد فوق هذا الكل شكون قال فيه مشاهد مخلة بالاداب خلي العباد تتفرج على الاقل على حلقتين والا ثلاثة منو وتشوف وتحكم ومن بعد العباد توا تحكم وتطلب قصانو كانو بلحق ؟؟؟انا ما ريتش حتى الحلقة الاولى ولكن نتصور ان الطاهر الفازع مشهور بجراتو في تناول قضايا اجتماعية وسياسية كيما عودنا من قبل في الصحافة وحتى في بعض الاعمال الدرامية وان السبب هو هذا ...يعني الجراة الزايدة في تناول قضايا "الصراع الطبقي " " التمييز ضد المراة " " انحطاط القيم " ...الخ 
ربي يصبر وبرة 
هاهو عمار يظهرلي تحول الى "كائن فضائي "بدا مهتم حتى بالبث الفضائي والدليل ( هنا و هنا ) زيد بزيادة ما تعطاتش ادوار لفنانين مبدعين كيما هشام رستم ,المنصف الازعر,رملة العياري ,سنية المدب ,عبد القادر مقداد ( شوف هنا زادة ) ... زعمة المسلسل هذا اقل فسادا للذوق من برامج اخرى لا تقدم الا الاضحاك الركيك من دون حتى مضمون ( في القناة 7 او قناة 21 او حتى حنبعل ) ...
يا سي عمار الفضائي ...التلفزة راهو نعرفوها كان في رمضان معناه شهير في العام ...اي عاد ندفعو في فاتورة عام كامل  وما نتفرجوش حتى شهر ؟؟؟؟ سيبها يرحم بوك ؟؟؟؟

هناك 7 تعليقات:

Houssein يقول...

Je ne comprends pas. J,ai pu voir les3 premiers épisodes sur Dailymotion !!

غير معرف يقول...

Ya Naked
Nous en avons ras le bol de toi
Nous sommes pour une Tunisie conservatrice
Nous sommes contre montrer et divulger les exceptions dans notre sociéets . Ces exceptins doivet etre plutot exterminés - Cette fois ci laiise passer mon commentaire, celui d'hier tu l'as censuré et tu parles de censure????s

حمزة عمر يقول...

المسلسل ما تحجبش! أما بدلولو وقتو بحيث ولّى يجي بعد الأخبار في عوض اللي كان يجي قبل الأخبار...صحيح اللي الحلقة الأولى وفات من غير جينيريك النهاية أما ما موش على خاطر قصّو منّو، فقط وقت الأخبار جا! معناها مشكلة متاع سوء تقدير للوقت، موش متاع حجب، و الدّليل اللي محتوى الحلقة الثانية ما ثمّاش فيه ما يدلّ اللي ثمّة حاجة ما شفنهاش في الحلقة الأولى

Legend Of The Fall يقول...

سامحني فيك. أما إنت قاعد تغلّط في الرأي العام على خاطر المسلسل التونسي "مكتوب" ما تعرّضش للحجب. أنا تفرّجت في 3 حلقات منّو حتّاش اللتوّة. قبل ما تكتب حاجة، لازمك اتبّع و اتشوف و تقرا و تتأكّد من صحّة الخبر. المسلس وقتو تبدّل و تنجم اتشوفو بعد التسعة متاع الليل على تونس 7. كان جيت في بلاصتك، لاما نكتب مقال آخر نعتذر فيه.

kmaira يقول...

bonjour
désolé; mais j'ai pas remarqué qu'il a été censuré, jusquà hier j'ai suivi la 3 épisode de ce feuilleton, bien que hatta eltawa, blid w rkik,w trop lent ama kima tkoul ommi, nheb nwassel sarek lbab darou:)))

عاشور الناجي يقول...

أولا مسلسل مكتوب نتابع فيه كل يوم يعني ما تحجبش

ثانيا رغم عدة ملاحظات لكن يبقى فعلا مميز من ناحية الإخراج ، و حتى التمثيل ،

النص بالغ شوية من ناحية الطبقة الغنية ، تقول التوانسة الكل أو أغلبهم تسوق في الهامر و المرسداس ، على 20 عايلة ثمة واحد برك فقير و واحد برك كان في ايطاليا والبقية الكل كرز

abunadem يقول...

سامحوني راو التعليقات متاعي كانت محجوبة من ادارة التعليقات انا يمكن لعبت فيها وما فقتش بعد ما حجبولي مدونتي
ثانيا انا ما تبعتوش المسلسل اما قريت الخبر في جريدة الصباح وساءني انو يتحجب واستغربت اكثر كيفاش المخرج متاعو الفهري ويتحجب ...من بعد عرفت انو تبدل وقتو من اعلام وحتى هذا يحتاج تعليق ؟؟؟؟