الخميس، 18 سبتمبر 2008

كلام الليل :الحوض المنجمي ...والحوض النسائي؟؟؟؟؟؟؟؟

يا ولدي ماني قتلك سيب عليك من هاذي حكاية الحوض....المنجمي ..تي ياخي ما ثمة حتى حكاية غيرها تحكيها...تي قالك الحوض هذا اللي يدخلو ...يصبح منجوم...يزلق ويتكعبر ...ويجيه مقص .
تي مرة واحد عامل فيها مشاغب هو دخل لهاك الحوض المنجوم ...ياخي ضربوه بكات...سيزو جابوه مفرش على ركايبو ...
تي حتى اللي دخلوه زعمة زعمة كوبل قال شنوة نوسوا بعضنا ...في الحوض ...واحد يدخل يبحر فيه ...والاخر يعس عليه فماش ما يجيه مقص متاع غدره ...حتى هوما طلعوا بالحق الفردة واختها ...اضرب المطلوق ...يستانس المشنوق...ياخي يجيهم مقص دوبل طيح الفردة على اختها ..
تي يا ولدي ...قالك عمار ما عادش نحب برجولية شكون يحكيلي على الحوض المنجمي ...احكيو على الحوض النسائي ...اشبيه الحوض متاع هيفاء وهبي ...
تي يا ولدي ...الحوض ...المنجمي ...بلاعة ...كبيرة اللي يدخل فيها تبلعو ...ايييه ..شوف مللي بدا قداش بلع عباد ...اش ملززك تدخلو ..والا حتى تجبد عليه ....راه كالبلاصة المسكونة ....يضربك المقص حتى كي تستخايلو ..والا وتحلم بيه ...والا تنوي نهار من النهارات تفكر فيه ...مالا سيب عليك من حكاية الحوض ...المنجمي يا ولدي ...وشدنا في ..الحوض النسائي.

هناك تعليقان (2):

غير معرف يقول...

الأحواض أنواع ،ثمذا حوض يطيّح وثمّا حوض يدوّخ ،ملا حالة :-)))

abunadem يقول...

مالا وينك ...ثمة حوض يطيحك بمقص ..وثم حوض يطيحك ما في عينك بلة..رد بالك من الحوض الاول خاصة ممنوع الحديث عليه خط احمر ..يجيك شلبوق من سي عمار ..والا قلم كيما يقول المصري ...اما الثاني يخليك قلم ؟؟؟