السبت، 27 سبتمبر 2008

تراجع عمار عن اعادة فتح يوتوب ودايلي موشيون؟؟؟


بعد الحلقة الناجحة اللي شوفناها في قناة الحوار التونسي واللي استضافت الصحفي والمدون الشجاع زياد الهاني ...اللي بعد حجب مدونتو من طرف عمار بوجلم تقدم بشكوى ضدو في شخص الوكالة التونسية للانترنت واللي باش تنظر فيها المحكمة نهار 4 نوفمبر ...وان كانت النتيجة شبه معروفة لسبب بسيط ان الوكالة ati حسب ما نعلم ماعادش هي صاحبة النظر في قضايا الحجب وانما وكالة اخرى نجمو نسموها الابنة الشرعية ل الوكالة الوطنية للسلامة المعلوماتية ....قلت بعد الحلقة هذية على حجب المواقع واللي كان الجينيريك متاعها هو كليب الحجب متاع خونا البرباش وارابيكا ...تراجع سي عمار وفتح زوز مواقع كبار تسكروا من بعد احداث قفصة هما دايلي موشيون ويوتوب قلت تحلو نصف يوم تقريبا واستبشرت العباد الكل خير بعد ما تحل الفايسبوك وقلنا بالكشي سياسة عمار تغيرت في حجب المواقع والا ندم والا خاف من قضايا المحكمة اللي تقدمتلو ..( في بالي بقضية خالد الكريشي وزياد الهاني ومانعرفش اذا سفيان ولينا قدمو زادة قضية والا لا ) على كل نتمنو انو تكون هذية غلطة كلافوية لانو عمار كيما تعرفو صوابعو كبار برشة على الكلافيي ويمكن ضغط على فلسة بالغالط ..خاطر الطبيعي هو الحجب و تسكير الجلغة للي يتكلم والاستثناء هو الكلام ...

هناك 4 تعليقات:

lina ben Mhenni يقول...

Je sais pas ce que sofiene a fait mais oui on fera ce proces car ca devient inacceptable.En faite la reouverture de dailymotion et youtube devait etre une panne dans les filtres et logiciels utiliser par l ATI

abunadem marzouki يقول...

ان شاءالله يا لينا حكاية عطب فني في الماكينة موش في صوابع عمار.
انا معاكم في حق التقاضي وان كانت الحكاية تبقى شكلية..

Werewolf يقول...

الأكيد اللي القضية باش تحدد المسؤوليات و كان ما تطلعش الآتي يي وراء الحجب، التهمة باش تُثبت على طرف آخر...معناها ثمة حاجة باش نربحوها في الحالات الكل

abunadem marzouki يقول...

Werewolf
نتصور المسالة شكلية كي ماقلت اما من الناحية القانونية ما تربح منو شيء خاطر كيما قلت القضية مقدمة ضد ATI وهذية ماعادش موضع نظر في الحكاية ..اما نربحوهم اعلاميا على الاقل ؟؟