الثلاثاء، 8 جويلية 2008

العنف.. المسيس بالرياضة ؟؟؟



مانيش باش نعاود نحكي في اللي حكا فيه طارق عن مهزلة رادس او محرقة رادس بالاصح في الماتش الاخير متاع الكاس بين النجم والترجي .ومانيش باش نعاود نحكي على الفيديوات اللي عرضت للمهزلة هذه .ولكن باش نحاول نلفت الانتباه لظاهرة خطيرة ماشية تكبر وباش تكون كارثة على الرياضة وعلى البلاد متاعنا ؟؟؟الي عملو جمهور ليتوال كان منتظر باش يصير بعد المؤشرات الخطيرة اللي لمسناها في كلام رئيسو معز ادريس في ماتش تصفيات البطولة ضد قابس وكيفاش يعتبر النجم تمثل تونس خاطرها ولاية ( دولة معنتها بورت بارول متاع دولة ؟؟؟) مش كيفما الافريقي والا الترجي حسب رايو اللي تمثل حوم ( جمع حومة ) وبالمناسبة راه اللي تعمل في قابس وقتها مش شوية من جمهور ليتوال نفسو من حرق وتكسير في منطقة العوينات للاسف ماحكاتش عليه وسائل الاعلام ؟؟؟ قلت كان متوقع ولكن للاسف الحاكم ماخذاش احتياطاتو الامنية اللي يلزمها تكون في حجم حدث كيما هكة ؟؟؟ والا كيفاش تفسر اللي شفتوه في الفيديو من حرق كميونة الاطفاء وغابة رادس دون ان ترى عون امن واحد ؟؟؟؟الا اذا ثمة " ان " في الحكاية ؟؟انا مانيش مع هذا الفريق او ذاك والكرة اصلا ما نتبعهاش كان مع الفريق الوطني ؟؟ ولكن نقول انو الخلل الامني هذا في مقابلة كرة صار فيها ماصار ( مقارنة بالحشد الامني اللي وقع في الحوض المنجمي ) يخلينا نطرحو الف سؤال وسؤال ؟؟؟ظاهرة كيف ما هكة ما تنجم تولد كان شكل جديد للعنف المسيس كرويا جهة ضد جهة ؟؟ وحومة ضد حومة ؟؟؟ شمال ضد جنوب ؟؟؟ وهكذا ؟؟؟ وتظهر تحالفات ؟؟ معارضة وموالاة ؟؟؟ في الكرة زادة أي نعم ؟؟؟ وتخلي الهوليغانز ( الظاهرة الانقليزية المتخلفة ) تتسربلنا من الكرة ؟؟؟ ويتحول العنف السياسي ( التطرف ) الى عنف رياضي ؟؟؟ وهاهو شوفوا بالدليل اش لقيت في احد المواقع على الانترنت من باب ضرب المثل ؟؟؟:






يبقى فقط نقول اللي موش الجامعة هي اللي مسؤولة على اللي صار ولا جمهور النجم ولا جمهور الترجي ولا الافريقي ؟؟ ولكن نتصور انو فمة تواطؤ اكبر ؟؟؟ خلى الامن يغيب ؟؟؟ والروح الهمجية تظهر ؟؟؟

هناك 9 تعليقات:

Tarek طارق يقول...

هذية حالات خطيرة! آخي هذا مش تحريض على الكراهية بالحق مش بالمغالطة؟؟ يلزم التصدي بكل جدية للهم الأزرق هذا إلي يظهر زعمة زعمة كاينو تفدليك...

الناس الكل متورطة في الجهوية

abunadem يقول...

يلزمها تدوينة جماعية هاذي يا طارق .الحكاية باش تتسيس؟؟

Selim يقول...

Je remarque que le régionalisme se porte toujours aussi bien
simuler une exécution, même par plaisanterie, est assez grave comme geste, comme le dit Tarek
c'est vraiment désolant de voir de tels comportements

غير معرف يقول...

أعتقد يا ناقد أن طرح الموضوع بهذا الشكل فيه تسرع في استخلاص النتائج
أولا : الأحداث اللي صارت من الناحية الموضوعية و مع اعتبار كل الظروف ليس لها صبغة استثنائية
ثانيا: و الأخطر في نضري هو التسرع في تعليق ما حصل على حساب الجهوية و الحال أن الجهوية الوحيدة القائمة في تونس هي جهوية السواحلية و اللي قائمة على خلفية سياسية و تفرد بالسلطة خلت الناس تكره كل ما هو ساحلي رغم أن أغلب السواحلية أنفسهم لا يرضيهم الوضع القائم و ل ينفكون يعبرون عن ذلك في أكثر من مجال.
أخيرا هناك حالة غليان شعبي لاشك فيها تحاول التعبير عن نفسها بأي طريقة و في كل المناسبات و لا علاقة لها بالجهوية إلا من حيث ما ترمز كلمة سواحلية للعصابات القائمة على المحسوبية من وقت بورقيبة و خاصة الآن و اللي تعتبر نفسها فوق مستوى بقية الشعب التونسي و التي جعل بعض مسئولي النجم بطريقة تعاملهم العام أنفسهم خير تعبير عنها عن قصد أو غير قصد..
لذلك أعتقد أنه من غير الحكمة التعميم و الحديث عن جهويات لأننا بذلك نجعل من كل تحرك في منطقة مسألة جهوية و هو ما يريده بالضبط من يشتد الغليان ضدهم في الوقت الحاضر

abunadem يقول...

que le régionalisme soit consciente c'est dommage ça sera de la politique

abunadem يقول...

يظهرلي فهمت اش حبيت نقول بالضبط وقت اللي حكيت على موقف سياسي واضح من الجهوية

غير معرف يقول...

أنا أظن أن الأحداث هذه أسبابها أعمق من ماتش كورة، أو من عصبيات جهوية، تماما كما أن أحداث قفصة ليست بسبب تحيز في عملية توظيف.

حسب رأيي، الأسباب الي كانت سبب في أحداث ما بعد مقابلة رادس أو بأحداث قفصة، هي أسباب اجتماعية واقتصادية متراكمة منذ فترة مش قصيرة، وما كانت تنتظر إلا في الشرارة التي باش تشعلها.

abunadem marzouki يقول...

معاك حق سميح في كونها اسباب اجتماعية واقتصادية اما يتم ساعات التلاعب عليها وتغذيتها خاصة في حالة سوسة اللي تعتبر روحها ولاية الدولة يلزمها تكون مركز كل شيء خاطر كلام معز ادريس ما يتلوحش

غير معرف يقول...

أولا : تصريح معز دريس المذكور، هل سمعته كإشاعات و إلا قريتو في مصدر رسمي؟ أنا ما ريتو في حتى مصدر رسمي وسمعت الي هو مجرد إشاعات تم تكذيبها.

ثانيا : كساكن لمدينة سوسة، أؤكد أن الشعور الذي تتحدث عنه مش موجود، على كل حال أنا ما ريتوش.
وتنجم تسإل الصيافة الي يصيفو في سوسة يلقاوش مشاكل.
أما المتأكد منه، الي فما إحساس عند برشة سواحلية الي تونس كاملة تكرههم.


أنا خارج المعادلة هاذي متاع نكرهوهم ويكرهونا، ومانيش اتواليست (نحب USMO "البلي بالشلطة"، زعمة زعمة، هاني معاكم لا تنساوني)، وفلسفتي في الموضوع هذا "إن أكرمكم عند الله أتقاكم". قلت هذا الكل باش نوري الي كلامي موش منحاز بقدر المستطاع.


من ناحية أخرى المشاكل صارت برشة مرات قبل، ونتذكر ماتش بنزرت والافريقي وإلا ماتش الترجي وباجة.
يظهرلي أي جمهور آخر، في بلاصة اليتوال، في الظروف هذيكة، راهو عمل نفس المشاكل، ولذلك نعاود نأكد الي المشكلة موش مشكلة جهويات بدرجة أولى.