توة عندي اكثر من اسبوعين بعيد على الدار ..هزيت العائلة للبحر ...لكن لاول مرة نجرب التدوين عن بعد حسيت انو ثمة التزام اخلاقي تجاه نفسي والناس باش نبقى نتبع العباد اش تكتب ونتبع الاحداث ونعلق عليها ساعات ...اما حسيت صعوبة كبيرة ياسر خاطر ما عندكش جهاز بحذاك وما عندكش انترنت في كل وقت تحب تدخل ...بعض احداث تسمعها في التلفزة تقوم تكتب عليها والا حكاية تسمع بيها في القهوة والا تشوفها في الشارع ما تنجمش تكتب عليها قي الوقت ...حاصيلو حسيت بصعوبة كبيرة ياسر في المدة هذية وزي مقاهي الانترنت مش بكثرة ومربوطين بوقت وساعات تمشي تلقاها معبية وساعات نلقى الكلافيي مش عربي او الجهاز ما يخدم كان على انترنت اكسبلورر تضيع وقت في برمجة الجهاز ...ووو توة عرفت قيمة انو يكون الواحد مستقل بجهازو وحدو في الدار ...والصعوبة تتعقد كي نفكر اني باش ننقل الخدمة وباش نسيب داري خاطر السنا مقدم في الحركة الوطنية للنقل وشوف نلقاش دار فيها تليفون وبره قدم على تليفون وقتاش يوافقولك وانت المودم في يدك وما تعمل بيه شيء ....وراكم لاحظتو ان مدونتي الثانية ما كتبت فيها شيء من مدة خاطر هاكي يلزمها جهد مضاعف متاع تسجيل وكتيبة وتنسيق وهاذيكة الصعوبة الاكبر اللي لقيتها توة وباش نلقاها في المدة الجاية ...
لذا فإن التدوين في اعتقادي يستلزم بالضرورة امور لوجستية لازم منها ؟؟؟ مش بركة الرغبة والقدرة على الكتابة ؟؟؟؟
لذا فإن التدوين في اعتقادي يستلزم بالضرورة امور لوجستية لازم منها ؟؟؟ مش بركة الرغبة والقدرة على الكتابة ؟؟؟؟
ليست هناك تعليقات:
إرسال تعليق