دي تبقى فوضى
طب يحيى النظام ..... لالالا ما يحياش
ما بقينا مرضى
والناس لاهي عارفه
تعيش وتسكت
ولا حتى عارفه
إزاي هترضى
جيوبها فاضية .. بيوتها فاضية
مخروبة أيوه ..
واللي خربها
محاسيب في دولة
ودولة سعادتووووووووووو
طب يعيش ولا يسقط؟؟؟؟
ولا أيه يا بلدنا !!!!!
ما خلاص شطارنا بقوا بُلادنا
وباليدنا مسنود من غيرنا
في السكة الأسطى
راكب تاكسيه وسايق
ودمع عينه خريج لجامعه
اشاوله يطنش
ما أصله واخد
بكالوريا قشطه و الفكة عنده
دبلومه رذله
ودكتوراه
في فن الاونطة
فإزاي هيقفلي
وليه اشاورله وهو
في نفسه أنه سلطان بلادنا
وأحنا العبيد
والدنيا عكا
مش قصدي عكا
ولا غزة ولا حصارها
بكا
أنا قصدي إن الدنيا عكا
برده عكا
ووالي عكا
وصلاح الدين
مركون
ع الدكه
وقراقوشوه ناهب
كل أمالنا
وسايبنا نهتف
بسقوط نظامه
ونقوله يكفى ..
وبرضوا ما يكفى
ويكفي كل اللي الحروف بهشه
ينفض ودانه ..
ويلعن أبو اللي أزعج منامه
أه يا رخامه
بشويش
أياك يسمع جنابه
ليقول بنشتم
وتبقى كل السبل لروما
ماشية على الجته عندي
نظام وفوضى
فوضى النظام
الكل عاكك .. عايز حصان
وميدان لوحده
الكل فاكر أن الحمام
مخلوق عشان يبقا له يافطة
أو يبقى عشوة
بعديها يركب حصان جنابه
ويسوق كل التنابله عنده
والناس غلابة
الناس غلابة .. وبأي حاجه
والله بترضى
يقولوا بكرا .. تاني يا بكرا
وأنا أصلي بكره
تسمع وداني .. وعود ببكرا
فين النهاردا
كان فين امبارح
ولا السنين اللي باعتنا
مكنتش سالكة
ولا كان في بالها
هيجي بكرا
وإزاي يا بكرا
هيتجينا واحنا راقدين ننوح
على شقفة رغيف
وكلام مفضوح
تبكي عيوني
يجي المحصل يحسبها ميه
يديني وصل بكل
الماهية
وأرجع اشحت .. تمن الفاتورة
مادوكها كانت للميه
لكن داهيه
لأن جسمي ارتعش شويه
فأفتكروا أني ماسك سلوك
السد العالي
وساحب أنا
تياره وحدي
و فاتورته طبعاً
دي تبقى عندي
وازاي هعدي .. غير لما اقلع ..
قصدي أدفع
كل اللي عندي
لو لقيوا عندي !!
وأمشي كما ولدتني أمي
وأهي حتى موضه
واعمل جسمي قزاز يوري
ايه المعدي
وهو في في جوفي حاجه
عشان تعدي
أيوة أفتكرت
هو … التحدي
يااااااااااه
الكلمة دي حد فاكرها
لقيتها بالصدفة والله يا سيدنا
ما أصل من يوم ما خطيت برجلي
كان نفسي أفهم
لمين التحدي!!
طلع كل الكلام ده
فشنك وردي
ويقولوا يحيا
ويقولوا يسقط
وانا اصلي غاوي
اركب قطر الصعيد .. وأسطح
والسكة يابا طويلة نيلة
فيها الخيول تجري وترمح
وترجع في أخر الليل حزينة
لا لقمة لاقيه
ولا حتى مطرح
طب ليه هنفرح
وإزاي هتفرح
ولمين هيحيا
لازم هيسقط
والكل يسقط
ما دام ولي النعم واكلها
وساب الديابة تحرس غنمها
والقط في أيده مفتاح كرارنا
يبقى يا ولينا
من أي فار
والدم .. ثار
ولالسه
ولا خايفين ليقولوا
فورانه يبقى فاتورة تالته
ما الغاز في سكة
راح للصهاينه
والشركه اللي بتدينا منه
غلت علينا
واديت عادينا .. حق وطنا
وحقوقنا صبحت
بس المهانة
و كلمة كرامة
نشلوها منا
يبقى لازم
أسقط من طولي
وهو يسقط
والكل يسقط
طب مين هينجح
معادلة صعبة
والأصعب منها
مصر الحبيبة .. ونيل دموعها
للسما معدي
وحسابها عندك ولا عندي
ولا هواه رايح في سكة
برضوا التحدي
لا يبقى زينهم .. زعيم لبلدي
ولا الخديو يرجع يغني
ولا رقص بلدي
ولا تحيا غير مصر حبيبتي
ويسقط الاستهبال
****************************************
الفنان التشكيلي والكاتب والصحفي
حسين راشد
نائب رئيس حزب مصر الفتاه
وأمين لجنة الاعلام
عضو اتحاد كتاب الانترنت العرب
أمين عام الاتحاد العربي للإعلام الالكتروني( تحت التأسيس)
ليست هناك تعليقات:
إرسال تعليق