الأحد، 31 أوت، 2008

تعلم دروس الوطنية من الدراما التركية ؟؟؟

مانيش من محبي المسلسل التركي اللي ملأ الدنيا وشغل الناس ولكن سخانة الطقس فرضت علي باش نحول حاسوبي الى بيت الصالة بحذا المكيف وهكاكة تفرض علي باش شفت بعض الحلقات منه ولكن اللي شدني في ها العمل التركي بخلاف اللي تعودنا بيه في المسلسلات العربية هو الروح الوطنية العالية اللي يمنوا بيها الاتراك واللي نجح اتاتورك في غرسها فيهم في نصف قرن برك : مثلا
  • ترسيخ فكرة الاقتصاد الوطني والمال الوطني من خلال ادارة مؤسسة العائلة اللي ما ظهرتش حتى ارتباط بمؤسسات اخرى خارجية او التبجح بتحويل اموال للخارج كيما تعودنا نشوفو في المسلسلات المصرية اللي عادة ما تكون مجلوبة من خارج او تتحول الى الخارج .
  • ترسيخ فكرة المدرسة الوطنية والتعليم العمومي الوطني حيث ان ابناء ها العائلة الغنية برشة كانوا ينجموا يقروا اولادهم في امريكا او في اوروبا في احسن المدارس والجامعات كيما يتفشخرو علينا المصارى لكن هوما خيرو يعطو صورة لتعليمهم ومدارسهم الوطنية اللي راهن عليها اتاتورك .
  • ترسيخ ثقة الناس بمؤسساتهم الاستشفائية الوطنية اللي خلت عائلة شاد اوغلو الغنية برشة تسلملها ولدها مهند رجل الاعمال وهو في احرج حالاتو الصحية باش يعالجوه اطباء اتراك مش كيما تعودنا في المسلسلات المصرية كبارات البلاد يتعففوا على مستشفيات بلادهم ويبعثوا اولادهم يتعالجوا في امريكا وكانو امتياز اجتماعي التعليم في الخارج والتداوي في الخارج والفسحة في الخارج ومصر تملك احسن المناطق السياحية واحسن علماء واحسن ...واحسن....
.............ولكن المسالة مسالة مبدا.. وثقة.. وثقافة .. وهذا للاسف مش كان في مصر بل في كل الاعمال الدرامية العربية يزرقونا ديمة ان الاخر افضل منا وان الارتباط بالغرب عنوان امتياز والارتهان بيه عنوان تفاضل اجتماعي ...حتى كرهونا في حاجة اسمها ...الوطني ؟؟؟؟والوطنية ؟؟؟؟؟؟

هناك 4 تعليقات:

adam يقول...

مصر تملك احسن.... او احسن..
لا ياصاحبي؛ لازمك تمشي لمصر تو تفهم اللي ماهش فخرة لكن عندهم حق على خاطر الامور في مصر تاعبة ياسر

غير معرف يقول...

dhaher fik matfarajtich fih mli7 ama rahou mohannad 9ra il bara w nihal dawat fi usa .ama rahou il mousalsal nja7 innou ya3mil publicité il torkiya w y5ali itourisme fiha yit7assel bi 60%.w kén fi romdhan fi 3oudh mintaswir il wé9a3 ili fadina minou yi5tarou des vues w des acteurs mizyénins w histoire d'amour atawa tchouf kiféch yinja7 .

foufou08 يقول...

كان تشوف زادة مسلسل سنوات الضياع البطل رجل أعمال ناجح عايش في حي شعبي ويتعالج في مستشفى تركي وعند أطباء أتراك.
أحنا نراو في الغرب كمثال يجب اتباعوا وديما نقرنوا في رواحنا بهم صحيح الانفتاح باهي لكن ما نخذوا كان القشور ونخليو المهم. رانا نجموا نصلوا الى ماخبر الي فيه كان ناثقوا برواحنا وبلادنا ومع بعضنا صلحوا أغلطنا ونتلهاو بالمهم

abunadem يقول...

كي ما قلت راني ما تبعتوش المسلسل ولكن شفت منو بعض حلقات هكة ظهرلي فيه دعاية للصنعة الوطنية
شكرا للزيارة