السبت، 16 أوت 2008

قالولي سيب عليك من هاذي حكاية التدوين ؟؟؟

ما نخبيش عليكم يا جماعة بعد حكاية الحجب وحتى قبلها بشوية بعد ما نشرت حكاية الحريقة وردود الفعل اللي عملتها بعض اوخيان وحتى افراد من العائلة قالولي سيب عليك من حكاية التدوين ..تي بالله انت اش رابح منها الحكاية كان التعب والمصروف الزايد وحرقان روحك ... بالله اش تصور منها كان المشاكل والفجعات تي بره راك كتبت على مشكل تصير هنا في اخر الجنوب شكون حاسك والا سامعك ....هاهو زعمة زعمة اسمك انونيم تي بالله يطلعوك كان يحبو عليك ...وزيد العباد اللي تكتب عليهم زعمة كان يصير معاك حاجة خايبة لاقدر باش يوقفو معاك ....تي بالله يضحكو عليك ويقولو عليك مهبول يضيع في وقتو في حكايات فارغة ....
انا نقوللهم هذية حكاية مبدا وخلي الواحد بالقليل يساهم في اصلاح عوج والا خنار ما تقدرش عليه في الواقع هوكة على الاقل تفضحو على النت .... يقولولي العوج والفساد من قبل مش توة ومن لوطة مش فوق ...من ها الزروس المسوسة اللي شادة كي المسمار الصدي لا يحب يخرج و لا تنجم عليه ... justement انا مشكلتي مع ها الزروس المسوسة اللي كان جيت dentiste بالحرام لم نلعب فيهم بالكلاب وخليهم فم خارب لا يقدر حتى على شربة الماء ...هاذم اللي غلاو علينا الخبزة ...وكثرولها بالطحين والتقفيف ... والعيبة عندهم ديمة حاجة باهية كي تجي من كبيرهم ... اما الباهي عندنا ما يعترفوش بيه ...بالله شكون منهم شد رئيس بلدية والا شعبة والا حتى طلع للبرلمان وتكلم على الماء الخايب اللي ما تشرباش حتى الزوائل ؟؟؟؟ شكون منهم تكلم على شبكة الكهرباء اللي في الصيف تولي تعيف والضو ديمة يقص عليكم ؟؟؟؟ شكون منهم حل فمو على شبكة الطرقات الخاربة اللي الموبيلات ما تنجمش تمشي فيها ؟؟؟؟؟ شكون منهم تكلم على البطالة الشباب وحللهم مشكلتهم ؟؟؟؟؟؟؟؟تي حتى هنشير ستيل اللي فيه اكثر من 100 هكتار عطاوه لواحد عندو من الفلوس ما يغني بلاد في الوقت اللي كان فيه يحل مشكل 100 بطال بشهائدو ؟؟؟؟ شكون منهم نهار قال يا سيدي شركات البترول اللي تجي للصحراء وتنقب ما يخدمو فيها كان اولادنا كيف ما عملو القفاصة ؟؟؟؟؟؟؟؟؟ شكون يحل فمو ويقول انو السياحة الصحراوية فلوسها ماشية لغيرنا لاصحاب الوتلة واللي معروفين انهم اصلا مش اولاد بلاد ؟؟؟؟؟؟؟؟بربي الجمال - اللي يركب على الجمل متاعو- في ها الصخانة ياخذ 4.500 مليم في حين القاوري يدفع للقيد - الدليل السياحي - 15.000 د توة هاذه معقول ؟؟؟؟؟؟؟؟ شكون تكلم عليهم ؟؟؟؟
ما تلقى كان ديمة لاباس ؟؟؟شايخين ؟؟؟؟ تي حتى الفلاحة اللي تدخل في شوية فلوس للفلاحة يجو الصحاح يضربوها منهم بدينار الكيلو ؟؟؟؟؟؟لا وزيد الحاكم يمنعهم حتى باش يحفر عين يسقي بيها نخلاتو ؟؟؟قال اشنية الطبقة المائية مهددة ؟؟؟؟؟؟؟؟ بربي قولولي ....اما احسن الواحد يفرغ غيضو في virtuelle والا يعديها بهبال ؟؟؟؟؟؟؟؟ والا نعمل كيفهم ونعيش حياتي طبااااااااااااال ؟؟؟؟؟؟؟؟...

هناك 11 تعليقًا:

WALLADA يقول...

الشيء غَـمّ على القلب و فاض و ماعادش يفيد فيه سكات ، و الي يسكت يا مهبول ، يا طبّال ، يا قلبو ميّت و حاشاك أبو ناظم أنّك تكون واحد من هالثلاثة .

3amrouch يقول...

ناقد
مثلما قلت حكاية مبدأ وقناعات
لاتترجل انت ايضا ارجوك
فقط لا يجب استعجال النتائج فالمشوار مازال طوييييييييييل

غير معرف يقول...

تعجبنــــــــي

غير معرف يقول...

تعجبنــــــــي

من بلد القيظ يقول...

أبو ناظم دوّن ، دوّن ،دوّن ،...وأكتب عن مايجيش في الخاطر ،ولا تصمت

غير معرف يقول...

إقرأ
أول كلمة هبطت من السماء ! ما هي إقرأ، بالظبط كما إكتب ! و ألي يومنا هذا ! الكليمتين هاذوم إمثلو : أصل الأنسانية و سبب التّقدم متاعها في كل المجالات. هي القراية بالدارجة ، بالعربي ما نجموهاش ! فما بالك بالكتابة : لا يكتبو و لا إخلو من يكتب ...لا يقرو و لا إخلو إشكون يقرى ! لا إنامو و لا إخلو إشكون إنــــام ! هاذوم يا سي المدّون و الناقد رقم 2 : خارجين على تــاريخ الأنسانية ! هاذوم ألي إصبو الماء في الرّكايب ... هاذوم لا يندبو لا إشدو الطفلة ! كان الجغ مــغ ! هاذوم سبب التخلّف متعنــــــــــــا ! في بالك يا سي الناقد بالي التلميذ التونسي ما يقراش !!! بمعدّل خمسة دقائق في اليوم ...هنا بدى الخراب ...خراب البلاد مربوط أساسا بالكتابة و القراءة !!!
يا ناس الواحد ما لقى أش يقرى ؟ إكتبو ليل و نهار و أعطــونا نقرولكم ؟ أما ما إطالبوناش باش ما نكتبوش !
قاسم

غير معرف يقول...

إقرأ
أول كلمة هبطت من السماء ! ما هي إقرأ، بالظبط كما إكتب ! و ألي يومنا هذا ! الكليمتين هاذوم إمثلو : أصل الأنسانية و سبب التّقدم متاعها في كل المجالات. هي القراية بالدارجة ، بالعربي ما نجموهاش ! فما بالك بالكتابة : لا يكتبو و لا إخلو من يكتب ...لا يقرو و لا إخلو إشكون يقرى ! لا إنامو و لا إخلو إشكون إنــــام ! هاذوم يا سي المدّون و الناقد رقم 2 : خارجين على تــاريخ الأنسانية ! هاذوم ألي إصبو الماء في الرّكايب ... هاذوم لا يندبو لا إشدو الطفلة ! كان الجغ مــغ ! هاذوم سبب التخلّف متعنــــــــــــا ! في بالك يا سي الناقد بالي التلميذ التونسي ما يقراش !!! بمعدّل خمسة دقائق في اليوم ...هنا بدى الخراب ...خراب البلاد مربوط أساسا بالكتابة و القراءة !!!
يا ناس الواحد ما لقى أش يقرى ؟ إكتبو ليل و نهار و أعطــونا نقرولكم ؟ أما ما إطالبوناش باش ما نكتبوش !
قاسم

غير معرف يقول...

شكرا جزيلا يا ناقد على هذه الكلمات الصادقة الخارجة من اعماق الروح و معبرة عن حقيقة فاجعة ... و الكاشفة لتهميش مبرمج لجنوبنا الحبيب .فمزيدا من العطاء و الكتابة لاجل تونسنا الحبيبة نحن هنا في باريس او اخوتنا في نانت و انجي ... و كذلك في كندا من ابناء الرديف و متلوي و ام العرايس كذلك القفاصة ... تاكد ان مدوناتكم هى بمثابة المرافئ التى نلتجا اليها من حرقة الغربة و عذابات الرحيل .فالف شكر...

غير معرف يقول...

سيدي الناقد ارجو ان تكون كتابتكم باللغة العربية الفصحىحتى يتسنى للاشقاء العرب الاطلاع عليها وفهمها و لكم جزيل الشكر

غير معرف يقول...

arrête méla madamek tu te poses la question :p

abunadem يقول...

شكرا للجميع لمن احس وجعي وحتى من كنت اختلف معهم
اولا اقول لهم عذرا على التاخر بالرد لاني بعد الحجب يبدو اني غيرت خيار ادارة التعليقات دون قصد وها اني تفطنت للمشكل وسويته .
ثانيا الكتابة هي خيار كما قال احدهم لم يذكر اسمه وهي موقف قبل كل شيء
ثالثا عن الكتابة باللغة العربية الفصحى احيانا تخرج الخاطرة من تلقائها بالدارجة ولا اقصد استنقاصا للغتنا العربية
شكرا للجميع